عطية الغريب
كنت معزوم على فرح وأثناء إنتظاري فى القاعة النص ساعة دى اللى بتكون قبل وصول العريس والعروس لفت نظرى بنت جميلة تقريبا عمرها 5 او 4 سنين عامالة تلف فى القاعة وتهزر وتلعب مع كل اللى قاعدين
شوية ظهر راجل فى الكادر فضل يجري وراها وهي تضحك وهو كمان رغم ان الدى جي كان شغال بس هما الإتنين ولا فى دماغهم شوية واشتغلت أغنية إليسا لقيت البنت فجأة جريت ناحية البيست والراجل وراها
وفضلوا يرقصوا هما الإتنين وكأنهم من سن بعض وعايشين قصة حب غريبة برغم إنبهارى الشديد بالموقف وإعجابي بطريقة وحركات البنت اللى كبيرة جدا على سنها وإندماج الراجل اللى تقريبا مش مركز مع حد غير مع البنت دى .. نط سؤال فى راسي .. إيه ده؟!!!
إيه العلاقة الجامدة والغريبة وكمية التفاهم والتواصل اللى بين شخصين الفرق بينهم كتير جدا ؟!!!
إيه السر ؟!!
و إزاى بقوا كده؟!!!
بعد الفرح بكام يوم فتحت الموضوع مع صديق وحكيت له الموقف وقلتله كل الاسئلة اللى المحشورة جوا راسي
قال لى ده يبقى باباها وهي بنته الوحيدة .
سألته يعنى تقصد مدلعها يعنى؟
قال لي الحكاية أكبر من كده بكتير بص أنا هحكيلك.
مراته أم البنت ماتت من 3 سنين وسابت له بنتهم دى وهو رافض يتجوز أى حد وتقريبا كرس كل حياته لبنته وشغله لدرجة إنه أيام أجازة الحضانة بياخدها معاه الشغل ورافض يجيب لها مرات أب
قلتله للدرجة دى هو مخلص لمراته؟
قال لى إنت مش فاهم كان في فرق سن كبير بينه وبين مراته الله يرحمها كانت أصغر منه بيجي 16 سنة و قعت فى حبه وهي فى تالته جامعة كانت فى منتهى الجمال والرقة والحيوية والذكاء وكل حاجه حلوه ممكن تتخيلها ده بالإضافة لإنها من عيلة وعرسان داخله وعرسان طالعه بس متفهمش شافته قالت هو ده ومفيش غيره
مفيش حد فى العيلة كان جاي معاها أو في صفها وكلهم كانوا شايفين إنها مرحلة سن العشرين وجنانه وقالوا هتنسي بس ده محصلش إطلاقا .. لما اكتشفوا انها مصرة عليه لامحال راحوا مغيرين نغمة السن وبقوا يلعبوا على الظروف فعلا ظروفه كانت منيلة بنيله وفضلوا يقولوا طب ده لوكان ناجح ازاى فضل كل ده من غير ما يحقق حاجه ده إنسان فاشل وشكله كده ضحك عليكي وداخل على طمع بس برضه مفيش فايدة فى الأخر استسلموا لرغبتها واتجوزته
عايز أقولك هما عاشوا مع بعض تقريبا 3سنين أقل شوية أكتر شوية بس مقولكش صاحبنا حاله اتشلقب وعدى فى شغله جدا وتقريبا لف معها ربع العالم لدرجة ان العيلة كانت هتجنن وكل الناس مش مصدقة ده كمان محدش كان بيقدر يلاحظ فرق السن ده
بعد ما خلفت البنت دى بكام شهر تعبت جدا الموضوع مطولش وكانت ماتت كل الناس بقت فى ذهول حتى هو
اعتقد انه كان هيموت بعدها لو بنتهم دى مكنتش جت بالمناسبة البنت نسخة من أمها ومن يومها وهو عايش لبنته على ذكرى مراته أو حبية عمره اللى اتمسكت بحبها بعد ما صدقت إحساسها .. فضلت عايشه رغم ان كل الناس بيقولوا إنها ماتت
صغر السن مش دليل على عدم النضج
النضج مش محتاج كبر سن .. النضج بيجي مع التجارب اللى بنعيشها فى حكايتنا وحكاية الناس
لما تحبوا أتأكدوا أن اللى حبتوهم هيخلصوا ليكم وانتو ميتين أكتر من وانتم عايشين عشان تكونوا مع بعض دنيا وأخرة مش هتكونوا مجرد صفحة النسيان يقدر يطويها فى أي لحظة
أكبر غلطة بنقع فيها هو إننا بننسى إن الهدف هو قلب الشخص وحب الشخص ومشاعر الشخص والحياة مع الشخص .. وبنتوه فى تفاصيل خايبه كلها بتصب فى الأخر فى كفة الخوف من كلام الناس
اللى اتحب مماتش
بلاش مرض الحسابات اللى دايما بيجي على حساب سعادتنا واللى نفسنا نعيشه
حب صح بقى .. اختار صح بقى .. و ركز مره واحده صح كفاية استهالك للمشاعر فى علاقات فاشلة من قبل ما تبدأ
حسابات البشر دايما ناقصه ملح القدر و مفاتيح الغيب وكلمة النهاية اللى محدش بيعرف ميعادها وده كفاية أوى إنك تعيش اللحظة من غير أى نفاق وكدب على نفسك